(حدثني عن بلدك)
نشدني وهاجت جروحي وكَلبي من الخفت وجر
سولفلي على بلادك يـﮔـلي وما دره الاغــبر
خنـﮔـني بعبرتي وجهي انخطف چـم لون وتغير
ومتمت ﮔـمت مدري اشـﮔـال ولساني بالحجي اتعثر
ولك شـﮔـدر
شوّصفنه ولك شـﮔـدر
عراق الخير والمثلي يوصفه ابيش يمكدر
الشعر وأهل الشعر محتاره شتوصفه ودفتر تطوي ابدفتر
ومني أتريد اوصفنه ولك شـﮔـدر
شوصفلك
جماله وطيبة احبابه
وهوه عذيبي وماي خنيابه
بلسم للجروح التدي عطابه
عراق وما كو بالدنيه تراب يعادل اترابه
شيصبرني على فراﮔــه ولك شكَدر
اوصفه ابيش
بالنعناع بالقداح بالـﮔَرنفل وعنبر
ولك شـﮔـدر
عراق البيه أهل البيت المن عدهم ضوه هالكون يتفجر
عراق البيه علي الكرار داحي الباب شفيع بساعة المحشر
عراق البيه أبو اليمه المن دمه تراب عراقنه اتطهر
عراق البيه راعي الجود ابو الحمله والأنصار والأكبر
عراق البيه علي الهادي وابوه وموسى ابن جعفر
عراق البيه ابو الحجه الحسن سيد العسكر
عراق البيه ابو صالح ومن اسمه سماء اعراق اتعطر
عراق البيه دم الصدر لمن طاح طفح غيض وغضب خضر
عراق وقبله للثوار
وعمت عينه اللذي الهذا الفضل ينكر
عراق وشلته وسط الروح ورسمته بالـﮔـلب منظر
عراق وحبه وي روحي شما تكبر بديهه وياهه من تكبر
عراق وصورته وياي تدور الكل كتر افتر
ولك شـﮔـدر
الوطن هذا النشدت عليه ولو ﮔـصر كلامي ومنك اتعذر
مو حـﮔـه اليفارك هالوطن ناره بسويد احشاه من تسعر
ومو حـﮔـه من تطك روحه ويضل كل عمره يتحسر
عراق بلا خمر طرواه بس ايمر عليّ اسكر
واشوف الواحد ابعشره واشوف الأبيض اباحمر
ومني اتريد اوصفنه ولك شـﮔـدر
عراق وخابت الأوهام التظن وي فرﮔـته تـﮔـدر
والظنت ربحت بلياه ومالت عنه تتكتر
أﮔـلهم عراق الخير مو خسران عراق الخير مو خسران
بس الفارﮔـاه يخســـــــــــــــــــــــــــــــــــــــــــــــ ــــــــــــــر
منقول
الثلاثاء يوليو 21, 2009 2:01 pm